Blog Haqqında
Yatmadım səhərə kimi,
Yaramı duza köçürdüm.
Aranı dağa daşıdım,
Payızı yaza köçürdüm.
Gördü ki, təzə cığaldı,
Qımışdı dünya bığaltı.
Ağlımı ağ buxaq aldı,
Ruhumu saza köçürdüm.
Fanidə ömür sürürdüm,
Altdan işimi görürdüm.
Özümü sözə çevirdim,
Sözü kağıza köçürdüm.
Axtarış
Açar sözlər
Sayqaç
İndi blogda: 4
Keçən ayın hiti: 2344
Dünənki hit: 39
Bugünki hit: 66
Ümumi hit: 12216
İyul 15, 2008 17:38 Yazar: sabirsarvan
Kimim var səndən özgə,
Hər bayram axşamında
Ya süfrə qırağında,
Ya bir ocaq başında,
Gözünü yaşartmağa?
Tanrıdan istədiyi
Əllərinə enməmiş,
Qəlbində gizlətdiyi,
Üzündə görünməmiş
Saçını ağartmağa?
Alçalar ağ gül açmaz,
Qara yellər yatınca,
Çox dözdüm,
Ömür üzdüm
Ağlamağa çatınca.
Bu yollar zalım yollar
Toz - torpağa bulandım.
Ha qaçdım, ha qurtuldum,
Yenə dərdə dirəndim.
Yıxılıb durdum, yenə
Sənə boylandı üzüm.
Kimim var səndən özgə,
Yıxılanda durub tez,
Durub...Üzünü gəzim?
Uğrunda baş verməli,
Bu dünyada kiminsə.
Baş verməli ki,
Torpağını tapanda,
Ölüm sənə gülməyə.
Kimim var səndən özgə,
Uğrunda ölməyə?!
Mən dünyanın gözündə,
Dünya məndə burulur.
Ağrılardan süzülüb,
Göz yaşlarım durulur.
Nə küləklər kəsəndi,
Nə də ki, mən sınanam.
Kimim var səndən özgə,
Bir zülmətin qoynunda
Səhəri düşünən tək
Durub düşünəm,
anam?!
SİZİN ARANIZDA | | 51 baxış
İyul 15, 2008 17:38 Yazar: sabirsarvan
Çağırma, çoxdan oyağam,
İsitmə, daşdan soyuğam,
Həyat dəniz, mən qayığam,
Atır o yana, bu yana.
Əl uzanmır, əldən tutam,
Dönüb hara gedim, atam?
Dörd tərəfim iynə, tikan,
Batır o yana, bu yana.
Ağac olsam yurd yerində,
Nəğmə ollam mərd dilində.
Yaxam qalıb dərd əlində
Dartır o yana, bu yana.
SİZİN ARANIZDA | | 46 baxış
İyul 15, 2008 17:37 Yazar: sabirsarvan
Çəkir məni qara torpaq
Aman qardaşlar, aman.
İstəyir ki, yıxa məni,
Axırıma çıxa mənim,
Aman qardaşlar, aman.
Kəndimizin torpağıdır,
Doğulduğum gündən bəri
Üzümə səpilməyə hazır,
Gözümə tökülməyə hazır.
Kəndimizin torpağıdır,
Bu şəhərin səs - küyündən
Çəkib məni qoparacaq,
Aranızdan aparacaq,
Aman qardaşlar, aman.
Dadıma bir kimsə yetməz,
Ahım qulaqlara çatmaz,
Gözlərim önündən getməz,
Yaddan çıxmış tənha məzar,
Aman qardaşlar, aman.
Bölməsiz | | 46 baxış
İyul 15, 2008 17:35 Yazar: sabirsarvan
Mən əzəl belə deyildim,
Gün dəyişdi oldum belə.
Ömrə qəfil güvə düşdü,
Min bir dərdə doldum, belə.
O sevgilər haqq işiydi,
Dərdiyim gül bənövşəydi.
Bəxt əlimdə bir şüşəydi,
Özüm daşa çaldım belə.
Könlüm dünyayla əyişdi,
Əyişdi, nəyi dəyişdi?!
Vədə gəldi, lələ köçdü,
Quru yurdda qaldım, belə.
SİZİN ARANIZDA | | 46 baxış
İyul 3, 2008 13:04 Yazar: sabirsarvan
Yuvasından dərbədər
Gəzən şəhərbəşəhər
Sənin oğlundur, ana.
Tüstüsü başdan çıxan,
Başı min işdən çıxan,
İşləri daşdan çıxan
Sənin oğlundur, ana.
Bəxtini selə verən,
Dərdini yola verən,
Bir ömrü yelə verən,
Sənin oğlundur, ana.
Kölgəsi var, özü yox,
Baş qoymağa dizi yox.
Bu dünyaya sözü yox,
Sənin oğlundur, ana.
SİZİN ARANIZDA | | 55 baxış
İyul 3, 2008 13:04 Yazar: sabirsarvan
Gör məni nə yerdə saxlayıb dünya,
Neyləyim, yolumu bağlayıb dünya,
Dərdi güc gələndə ağlayıb dünya,
Acı göz yaşını silər mənimlə.
Saçımda illərin tozu görünər,
Qor olmuş arzumun közü görünər
Düşmən xiffətimi görüb sevinər,
Dostlar sevincini bölər mənimlə.
Ümidlə yaşadım bir ömrü mən ki,
Başımın üstünü alıbdır çən ki.
Yıxılıb ölərəm, əgər bilsəm ki,
Hamının kədəri ölər mənimlə.
SİZİN ARANIZDA | | 49 baxış
Yazılar cəmi: 7
Sonrakı səhifə »
